مرغم عليك يا صُبح مغصوب يا ليل
لا دخلتها برجليّا ولا كان لي ميل
شايلينـّي شيل دخلت انا في الحياة
وبكرة ح اخرج منها شايلينـّي شيل
عجبي!!
وانا في الضلام من غير شُعاع يهتكُه
أقف مكاني بخـــــــــــــوف ولا أتركُه
ولمّا ييجي النـــــور واشوف الدروب
أحتار زيادة أيّهُــــــــــــــــــم أسلكُـه ؟؟
عجبي !!
نظرت في الملكـــــــــوت كتير وانشغلت
وبكلّ كلمة ( ليه ؟) و( عشانيه ؟) سألت
أسأل ســــــــــــــؤال .. الردّ يرجع سؤال
واخرج وحيرتي أشدّ ممّــــــــــــــا دخلت
عجبي !!
يا باب يا مقفــــــول إمتى الدخول ؟؟
صبرت يامــــــــا واللي يصبر ينول
دقيت سنين ، والردّ يرجع لي : مين ؟؟
لو كنت عــــــــارف مين انا كنت اقول
عجبي !!
سهـِّير ليالي ويامـــــــا لفـّيت وطـُفت
وف ليلة راجع في الضلام قمت شفت
الخــــوف .. كأنه كـلب ســــدّ الطريق
وكنت عاوز أقتله بسّ خـُـــــــــــفت
عجبي !!
دخل الربيع يضحك لقاني حزين
نده الربيع على إسمي قلت له مين
حط الربيع الورد جنب مني وراح
وايش تعمل الأزهار للميتين ؟؟
عجبي !!
على رجلي دم نظرت له ما احتملت
على إيدي دم .. سألت : ليه ؟ لم وصلت
على كتفي دم ، وحتى على راسي دم
أنا كلي دم !! قتلت والا اتقتلت ؟؟
عجبي !!
أنا كلّ يوم أسمــــــــع : " فلان عذبوه "
أســــــــــــرح في بغـــداد والجزاير واتوه
ما اعجبشي م اللي يطيق بجسمه العذاب
واعجب من اللي يطيق يعذب أخـــــــوه !!
عجبي !!
دخل الشتا وقفل البيبان ع البيوت
وجعل شعاع الشمس خيط عنكبوت
وحاجات كتير بتموت في ليل الشتا
لكن حاجات أكتر بترفض تموت
عجبي !!
فتحت شبّاكي لشمس الصباح
ما دخلش منه غير عويل الرياح
وفتحت قلبي عشان أبوح بالألم
ما خرجشي منه غير محبة وسماح
عجبي !!
غمست سنـَّك في الســـــــواد يا قـــلم
علشــــان ما تكتب شعــــــر يقطـُـر ألم
مالك ؟؟ جرى لك أيه يا مجنون ، وليه
رسمت وردة وبيت وقـــــــلب وعلــــم ؟
عجبي !!
أوصيك يا إبني بالقمـــــــــر والزهور
أوصيك بليل القاهرة المسحــــــــــور
وان جيت في بالك .. إشتري عقد فل
لأيّ سمــــــــرا ، وقبري اوعى تزور
عجبي !!
حاسب من الأحزان وحاسب لها
حاسب على رقابيك من حبلها
راح تنتهي , ولابد راح تنتهي
مش انتهت أحزان من قبلها ؟؟
عجبي !!
ولـــــــدي نصحتك لمّا صوتي اتنبح
ما تخافشي من جنـّي ولا من شبـــــح
وان هبّ فيك عفـــــــــريت قتيل اسأله :
ما دافعش ليه عن نفسه يوم ما اندبح ؟؟
عجبي !!
يا عندليب ما تخافشي من غنوتك
قول شكوتك ، واحكي على بلوتك
الغنوة مش ح تموّتك ، إنمــــــــــا
كتم الغنا هـــــــــوَّ اللي ح يمَــــوتك
عجبي !!
ياللي بتبحث عن إله تعبـُــــــــــده
بَحْثِ الغريق عن أيّ شيء ينجده
الله جميل ، وعليم ، ورحمن رحيم
إحمل صفاته وانت راح توجــــــده
عجبي !!
موضوع: عجبى لصلاح جاهين 
